जनता 4k न्युज महोत्तरी — महोत्तरी निर्वाचन क्षेत्र नं. ३ का प्रतिनिधिसभा सदस्य उज्जवल कुमार झा आफ्नो फरक पहिचानका कारण यतिबेला चर्चामा छन्।
टाउकोमा राखिएको करिब डेढ फिट लामो टुप्पी (टिकी) का कारण प्रारम्भिक चरणमा विभिन्न टिप्पणी र आलोचना खेपेका झा अहिले भने त्यही शैलीका कारण चिनिन थालेका छन्।
हालै राष्ट्रिय स्वतन्त्र पार्टी (रास्वपा) ले काठमाडौँमा आयोजना गरेको दुईदिने अभिमुखीकरण कार्यक्रममा सहभागी भएका झा कार्यक्रमस्थलमै सबैको ध्यानको केन्द्र बने।
कार्यक्रमस्थलमा झा गाडीबाट ओर्लिएलगत्तै अधिकांश सञ्चारकर्मीको ध्यान र क्यामेरा उनको टुप्पीतर्फ केन्द्रित भएको थियो। सहभागी १८३ सांसदहरूमध्ये झा आफ्नो विशिष्ट पहिचानका कारण अलग देखिएका थिए।
अहिले झाको टुप्पीसहितका तस्वीरहरू सामाजिक सञ्जाल तथा विभिन्न अनलाइन सञ्चारमाध्यममा व्यापक रूपमा साझा भइरहेका छन्। यससँगै उनलाई नामभन्दा पनि “टुप्पी सांसद” भनेर चिन्ने प्रवृत्ति बढ्दै गएको देखिन्छ।
निर्वाचन प्रचारका क्रममा समेत झा घरदैलो अभियानमा जाँदा उनको टुप्पी मतदाताको ध्यान आकर्षित गर्ने प्रमुख माध्यम बनेको स्थानीयहरू बताउँछन्।
इतिहाससँग तुलना गर्दा, पञ्चायतकालमा महोत्तरीका कुलानन्द झाको हातमा रहने लौरो (लठ्ठी) उनको पहिचान थियो भने अहिले उनका नाति उज्जवल कुमार झाको पहिचान टुप्पी बनेको छ।
महोत्तरी क्षेत्र नं. ३ मा आफ्ना निकटतम प्रतिद्वन्द्वीभन्दा झण्डै तेब्बर मतान्तरले विजयी भएका झा अहिले राजधानीमा समेत आफ्नो फरक शैलीमार्फत छुट्टै पहिचान स्थापित गर्न सफल देखिएका छन्।
