गौर (रौतहट) — दुई समुदायबीच भएको विवाद उग्र बनेपछि प्रशासनले गौरमा कर्फ्यु आदेश जारी गरेको छ।
गौर नगरपालिका–६ सबगढा क्षेत्रमा हिन्दु र मुस्लिम समुदायबीच तीन दिनअघि जन्ती मस्जिद नजिक पुगेपछि सुरु भएको विवाद शनिबार पुनः चर्किँदा सदरमुकाम क्षेत्र तनावग्रस्त बनेको हो।
प्रहरीका अनुसार लगातार दुई दिनदेखि भइरहेको झडपका क्रममा ३ वटा गाडी र २ वटा मोटरसाइकलमा आगजनी गरिएको छ। जिल्ला प्रहरी कार्यालयका डीएसपी विष्णु प्रदीप बस्यालले शुक्रबार पनि झडप भएको र शनिबार स्थिति थप तनावपूर्ण बनेको जानकारी दिएका छन्।
आक्रोशित समूहले गौरस्थित एक पेट्रोल पम्पमा तोडफोडसमेत गरेका छन्। सम्भावित अप्रिय घटना हुन नदिन सुरक्षा व्यवस्था कडा पारिएको छ भने प्रहरीले स्थिति नियन्त्रणमा लिन प्रयास जारी राखेको जनाएको छ।
प्रशासनले सर्वसाधारणलाई घर बाहिर ननिस्कन, अफवाहमा विश्वास नगर्न र शान्ति कायम राख्न आग्रह गरेको छ।
