जनता 4k न्युज सिरहा । प्रतिनिधिसभा निर्वाचन क्षेत्र नं. २ अन्तर्गत नवराजपुर गाउँपालिकामा राष्ट्रिय स्वतन्त्र पार्टी (रास्वपा) का उम्मेदवार शिव यादवले घरदैलो तथा भेटघाट कार्यक्रमलाई तीव्रता दिएका छन् । 

बुधबार नवराजपुरका विभिन्न टोल–बस्तीमा पुगेका यादवले स्थानीयवासीसँग प्रत्यक्ष संवाद गर्दै मतदाताको आशिर्वाद लिएका हुन्। घरदैलोका क्रममा उनले शिक्षा, स्वास्थ्य, कृषि र रोजगारीलाई प्राथमिकतामा राखेर काम गर्ने प्रतिबद्धता व्यक्त गरे ।

यादवले विगतका वर्षहरूमा जनप्रतिनिधिहरूले गरेका वाचा पूरा नभएको भन्दै अब परिणाममुखी राजनीति आवश्यक रहेको बताए। “जनताको भरोसा जितेर मात्र परिवर्तन सम्भव छ,” उनले भने, “हामी भाषण होइन, कामबाट विश्वास जित्न चाहन्छौं ।”

स्थानीयवासीले सडक स्तरोन्नति, सिंचाइ व्यवस्था, किसानका लागि मल–बिउको सहज उपलब्धता तथा युवाहरूका लागि रोजगारी सिर्जना प्रमुख मागका रूपमा राखेका थिए। त्यसको जवाफमा यादवले क्षेत्रको विकासका लागि स्पष्ट योजना र पारदर्शी कार्यशैली अपनाउने दाबी गरे ।

नवराजपुरमा आयोजित कार्यक्रममा युवाहरूको उल्लेखनीय सहभागिता देखिएको र परिवर्तनको पक्षमा माहोल बन्दै गएको रास्वपाको दाबी छ ।

निर्वाचन नजिकिँदै जाँदा सिरहा–२ मा विभिन्न दलका उम्मेदवारहरू घरदैलो अभियानमा सक्रिय देखिएका छन्। राजनीतिक विश्लेषकहरूका अनुसार यस क्षेत्रको मत परिणाम स्थानीय मुद्दा, उम्मेदवारको पहुँच र संगठनको सक्रियतामा निर्भर रहनेछ ।